![](/contentassets/bbaccc67c8704124a232759dddede84d/nhh-forum---panel.jpg?factor=2&quality=90)
Foreslår differansiering av matvareprisar
– Daglegvarebransjen bør lære av fly- og hotellbransjen når det kjem til prising av varer, sa NHH-professor Frode Steen under NHH Forum tirsdag.
«From Shopkeeper to Data Analyst» var tittelen på årets føredrag under NHH Forum. Her var NorgesGruppen invitert til å snakke om den digitale revolusjonen som har endra forretningsmodellane i bransjen dramatisk.
– Vekst er ekstremt viktig i denne bransjen og vi nyttar data på alle nivå for å forbetre oss, sa marknadssjef Truls Fjeldstad i NorgesGruppen.
– Unik innsikt
Ifølgje han har NorgesGruppen ein fordel samanlikna med for eksempel Facebook når det gjeld å utnytte stordata. Grunnen til dette er at dei så tydeleg kan følgje med på kva produkt kundar brukar pengar på.
– Vi har ei heilt unik innsikt som gjer at vi mellom anna kan tilpasse beskjedar til kvar enkelt kunde. Eksempelvis kan du få opp handlelister i appen basert på dine tidlegare kjøp og få tilpassa rabattkupongar, sa Fjeldstad.
![](/contentassets/424aba067fca457f99d6d4fdfc581544/nhh-forum-norgegruppen.jpg?width=2416&factor=2&quality=90)
NorgesGruppen er landets største aktør innan daglegvarebransjen. Selskapet har 1800 daglegvarebutikkar og over 800 kioskar og utsal. 40.000 tilsette er tilknytt NorgesGruppen.
Same vare – ulik pris
Professor ved Institutt for samfunnsøkonomi, Frode Steen, meiner NorgesGruppen kan bruke innsikta dei får til å differensiere prisane i større grad.
– Både fly- og hotellbransjen set prisane etter kor stor etterspørselen er. Amazon gjer det same når du søker etter bøker. Kjem du for eksempel tilbake for andre gong for å søke etter ei bok, kan du oppleve å få den til ein rimelegare pris enn første gong du sjekka.
Prisinga av varer i daglegvarebransjen bør følgje etter, ifølgje Steen.
– Når det gjeld daglegvarebransjen veit vi at nokon produkt er meir populære i enkelte deler av landet. Difor meiner eg ein kan vurdere å prise same varer ulikt etter kor i landet dei blir seld, sa Frode Steen.